نبروزه خونی

ای  سالی نَزدیکی عیدا

  ای هف هَش روزی مندا مرا وایدا

 بهاری سَرو کَلَه اِسا پَیدا  

ژِنَکه لکٌلا شورین مِردَکِن بازار دِره  کَرین عیدَ سَوٌدا  

هر کَس ای جوری گیرفتارا

همه یَندی گینه نا ک تازه سال کرا درا

انجورَه موقَع هر کس خا آبرو داری بکَره دِه برا

اگَه مِهمون شَه چِ کَه صبا چه گَو مَبَرا

عیدَ  دِه خلاصَه ادمی سرا ادم درا

اگَه اشته دس خالی بوبو ت ماتم درا

گوش بدَه ترا بوام ام ماجرا 

رَفِقَتِی داریم چِه دَدَه تاجرا

دییَرمازیا ویندمَه چِه عموزوهَ یا بَرا

سلام علیک علیک سلام  چمه تاجرَه رفقی پَیغوم ادوهَ مرا

 چمه نَنَه دگلَه وَرَه داری خورتَشا

لکلا شورتَشا کَنی ویشورتَشا

وَرَه گلان پولَتِه کَه کنجی نٌوئشا

أیرا هزار نقشه کَشَشا

ایته مرا خَلا بخری ایته کَرا بکَری سَوٌدا

ایته نی جا بدِی روزی مَوادا

شمَه سَرم درد وَردَه برا بشَم سَرِه اصل ماجَرا

از ام خردَنینه شیمَه

بَما چمه دیلی دَلَکَه امِه مرا رَفِق نینَه

نَنَه منَه واتَه اشته هواسی جَم اَکه

نِکی شمَه کَلَه فتوا بدَه مردومی سرا دَلَکه

نِکی شمَه را مَردومه خردَنون الَکه

نِکی شمَه را دوکونَوَر را دَلَکه

نِکی کاری بکَری چِه بو بَرا

ژَنم ت کشم نییَرزم اشته چِمی سو بَرا

خَیلی سفارشش کردَه م  منی واتَه چَشم نَنَه 

چمه هواس إسَه هرچی بَه چمه گردَنه

مَوا لوئهَ گوشاکَه مَشع

اگَرد ترا کَه دَشع

خلاصه نِبَه شیمه خردَنینَه چمه رَفِقی سرا

نِزک ابیمنَه ویندمَه سیا دَبَه یا بَرا

واتمَه چَه چرا سیا دَبِشَه

چرا آلوسی رَنگ اوِشَه

واتشَه چ ترا بوام برا

پول ندارم ک بخرم خَلا

واتمَه اشته دَدَه تاجرَه بَ چه پول چَه

واتشَه چمه دَدَه امَه پول نِدَه

پولی خرج نِکَره بَره جا دَه

از خَلا ندارم دَکَرم م نِه أدَه

واتمه رَفَِق چمه دسی ترا چ برا

از  چ شام کرده ترا

واتشه از ایله نَبروزی دارم قشنگه بَخدا

بشَم اوشان ام مَلَه کو از خونوم ت واگیر بکَه مرا

واتمَه  بِری شیطونی اَسبی ویرا

چنَه بشَم اخا اسبَه مَندَه مردومی سرا

واتشَه مَتَرس اسبَئون از رونوم ترا

قَشنگه پولی ویگِرَم زونوم ترا

واتمَه م دَس بکَش برا بوشوم کَرا

نَنَه بوزونو اوشان م  بَرکَره سرا

واتشَه انجورَه رَفِقیشه دِه

نخوای کاری بکری مرا

امی ک واتشَه مرا

چمه غیرَتی بَرش هردَه واتمه بشَم پناه بَر خدا

شَوَه سا ویرمَه الَکیمنَه ام سرا أ سرا

أی خوندَه م واگیر کردَه أیرا

اینَفَری خش آی اینَفَری بد ای

اینَفَر پول آدِی اینَفَر وای بشَه أیلَه سرا

براجان مَوا ای سرای د  دَفَه شِمنَه

تا واتمنَه زبِسمِلا مِردَک بَرمه سرا

واتشَه مَگَه هسَه نخوندنَه مرا

خجالت شمَه نِگِره 

مَگَه ادَم ای نَفَری کو د  دَفَه پول ویگِره

م  داریش چمه دیل اومَه چمه لوکی بنی جیمَندَه

چمه نَفَس شَه  جیری ویمَنده

ویندمَه چمه رَفِق نی لَرزه

واتمه الان دَوَزَم أگَه مِردَک بَرزه

تا اریمینَه شیمنَه دَوَزَم

 تا شیمینَه رَمشی بَروَزَم

مردَکی اسبَه أمَه دَنشتَه

آرَسَه م پِشتَوَر دِه گِتشَه

اسبَه م جوهَ جوهَ کَردَه منش ویجَردَه

چمه خلاتیانش گازینه پَل پَلش کردَه ویکَردَه

چمه جان بَرشَه آمَردَه

چمه رَفِق دَوَشته پِشتَه وَر نِه اگَردَه

مِردَک ارَسه اسبَش لافندینه گَتَه مش سیفا اکردَه

اشتَن زوهَ خلانش وَردَه م دَکردَه

چمه دَسی گِتشَه مش بَرَه بَر کَردَه

اخ گردنم بچَکه چرا نَنَه لوئه گوشم نِکردَه

ارَسیمه شیمَه کفا کَه پِشیمه

اریمینهَ پتو بنی جیشیمَه

ای ساعَتی گذشته ویندمَه قرار ندارم

دردی م کشتَه کا بوشوم راه فرار نِدارم

ام پَلو أ پَلو کَردمه تَختان کَردَه ستا ستا

ایدَفَه ویندمَه برامَی نَنَه کرا  آ

اومهَ دَرمهَ پَتوش راس آکَردَه

واتشه ام خَلا کی ت دَکَردَه

کاشه را چرا نَخسی 

چرا هَپرا وای چرا خاوی کو تَرسی

مَوا خَیلی وَقتَه کرا جان دَم

خاوی کو دوشبونهَ ک اسبان دَم

نَنَه چمه دَسو پا شورتشَه تا روز آبَه 

تا ساعت اومه هفتی سر دوز آبه

دوئهَ دوئه کَردشَه چمه سرش بَرگِندَه

هر دَفِی فوکی م ژَنی وای خاکی اشته سری دَکه گندَه گندَه

سیبسَری مش بَردَه دُکتری را

دکتری واته خیلی سنگینه اشته دٌعا

خیلی گرونه اسبَه زَم آکردِه دَوا

مونکینه حار اوی برا

نَنَه واتَه دٌکتر جان هنتَه کو ام نای سرا

الان حار ابو چه خاکی چمه سر دَکرم اخا

نیویشتشَه ای کولَه باری دَوا

واتشه امون بَه تَمون آوَه هنی بوَه مرا

چمه جان زَم اَوَه بیمَه سزا

چمه رَفِقینی نشته بخره خلا

أسالنَه عیدی کردمونه دٌکتره را

وَرَگلان پولَتیَه نی دومنه ام را

عید مرا بَه عذا هردمَه یَکسَره دَوا

شمه سَرم درد وَردَه برا

هر کس پیلَتَری لوئه گوش مَدَه چه سَر آ بلا

علی رستم پور هفتخوانی